problem solving meeting with paracetamol Part 1
പാരസെറ്റാമോളുമായി ഒരു അഭിമുഖം
പുതച്ചുമൂടിക്കിടക്കുകയായിരുന്ന എന്നെ രാവിലെ തന്നെ ആരോ പരിഭ്രമത്തോടെ വിളിക്കുന്നു.
"ലീനാമ്മേ ഇങ്ങനെ മൂടിപ്പുതച്ചുറങ്ങിയാൽ മതിയോ ...ഈ അതിക്രമങ്ങളൊക്കെ കണ്ടിട്ട് മിണ്ടാതിരിക്കുവാണോ"
"ആഹാ പാരസെറ്റാമോളുമാരുടെ ഒരു ഗ്യാങ് തന്നെ ഉണ്ടല്ലോ ...എന്തുപറ്റി "
"ഞങ്ങൾ മാത്രമല്ല , കരളുണ്ട് , തലച്ചോറുണ്ട് കൂടെ ഹൈപ്പോതലാമസും അതിന്റെ തെർമോസ്റ്റാറ്റും , പിന്നെ എൻസൈമുകളുണ്ട്.
ഇന്നൊരു പ്രോബ്ലം സോൾവിങ് മീറ്റിംഗ് വെക്കാമെന്നു പറഞ്ഞിട്ട് മറന്നുപോയോ".
"അലാറം അടിച്ചില്ല അതുകൊണ്ടല്ലേ ....ഞാൻ ദേ വന്നു , നിങ്ങളിരിക്ക്"
തലച്ചോറ് അടുക്കളയിൽ പോയി ചായ ഇട്ടപ്പോഴേക്കും ഞാനെത്തി . ചായ ചൂടോടെ കുടിച്ചു
"ആഹാ , നല്ല ഏലക്കയും കുരുമുളകും ചേർത്ത ചായ, ഗുഡ് ജോബ് ബോയ്" .
എല്ലാവരും തലച്ചോറിനെ കയ്യടിച്ചു അഭിനന്ദിച്ചു.
"നമുക്ക് തുടങ്ങാം "
പാരസെറ്റമോൾ :
ഞങ്ങളെ എല്ലാവരും ദുരുപയോഗപ്പെടുത്താൻ തുടങ്ങിയിട്ട് കാലമേറെയായി. അതൊക്കെ പോകട്ടെ, ഈ കോവിഡ് കാലത്തു വിമാനത്തിൽക്കയറാൻ പോകും മുൻപേ ഞങ്ങളെ രണ്ടോ മൂന്നോ പേരെ ഒരുമിച്ചു വിഴുങ്ങിപ്പോയവരുണ്ട് . മഹാപാതകമാണ് ഇതൊക്കെ. ശരീരത്തിലെ കൂടിയ ചൂടിനെയേ ഞങ്ങൾക്ക് കുറയ്ക്കാൻ പറ്റു. ഇല്ലാത്ത പനിയെ എങ്ങനെയാണു കുറക്കുക.
കരൾ :
രണ്ടു മൂന്നെണ്ണമൊക്കെ ഒരുമിച്ചു കഴിച്ചാൽ എനിക്കതു താങ്ങാൻ പറ്റൂല്ല. ഞാൻ വേണ്ടേ ഇതിനെയൊക്കെ വിഷമയമില്ലാതെ മൂത്രം വഴി പുറത്തുവിടാൻ. ഗ്ലൂടാത്തയോൺ ( Glutathione ) എന്ന എൻസൈം ആണ് പാരസെറ്റാമോളിനെ വിഘടിപ്പിക്കുമ്പോൾ ഉണ്ടാകുന്ന വിഷമയമായ രാസപദാർത്ഥത്തെ അപ്പോളപ്പോൾ നീക്കം ചെയ്യുന്നത്. ഒരുപാട് ടാബ്ലറ്റ് ഒരുമിച്ചോ അടുത്തടുത്ത ഇടവേളകളിലോ കഴിക്കുമ്പോൾ അതിനാവശ്യമായ ഗ്ലൂടാത്തയോൺ സ്റ്റോറേജ് എനിക്കില്ല. അതുകൊണ്ട് ആ വിഷമുള്ള രാസപദാര്ഥം ശരീരത്തിൽ പ്രശ്നമുണ്ടാക്കും. അപ്പോൾ എല്ലാവരും കൂടി എന്റെ നേരെ തിരിയും. ഇനി ചിലരുണ്ട് , കള്ളുകുടിച്ച് എന്നെ നശിപ്പിച്ചു ഒരു പരുവമാക്കി വെച്ചിരിക്കുകയാണ് . മദ്യവും പാരസെറ്റമോളും വിഘടിപ്പിച്ചു അപായമില്ലാതെ പുറംതള്ളാൻ ചില സാഹചര്യങ്ങളിൽ എനിക്ക് ഒരു പ്രത്യേക എൻസൈമിനെ ആശ്രയിക്കണം, CYP 2E1 എന്ന് പറയും . രണ്ടിനെയും വിഘടിപ്പിക്കാൻ ഈ ഒരു എൻ സൈം തന്നെ വേണം. രണ്ടും കൂടെ ഒരുമിച്ച് അമിതമായ അളവിൽ വന്നാൽ എനിക്ക് ഈ എൻസൈമിനെ പെട്ടെന്ന് ഫീൽഡിൽ ഇറക്കാൻ പറ്റില്ല. ഇതൊക്കെ ചോദിക്കാനും പറയാനും ഇവിടാരുമില്ലേ.
ഹൈപ്പോതലാമസ്:
പാരസെറ്റമോൾ എന്നോട് പറയേണ്ടത് ശരീരത്തിലെ ഉയർന്ന താപനിലയെ കുറക്കണം എന്നാണ് . അതിനനുസരിച്ച് ഞാൻ തെർമോസ്റ്റാറ്റ് സെറ്റ് ചെയ്യും. തലവേദന പോലുള്ള വേദനകളുണ്ടെങ്കിൽ അതും കുറക്കാൻ എന്നോട് പറയാം . ഇതിപ്പോ എന്തിനും ഏതിനും ഇടിച്ചുകയറി വന്നിട്ട് എനിക്കിപ്പോൾ എന്ത് ചെയ്യണം , എന്ത് ചെയ്യേണ്ട എന്ന അറിയാത്ത അവസ്ഥയാണ് . ദയവായി ഒന്ന് പറഞ്ഞു മനസിലാക്കണം.
തലച്ചോർ : പനിയും വേദനയും നീർവീക്കവും ഉണ്ടാക്കുന്നത് ചില പി ജി ക്കാരാണ് . പ്രോസ്റ്റാഗ്ലാൻഡിൻസ് (Prostaglandins ) എന്ന് പറയും
സൈക്ലൊ ഓക്സിജെനേസ് ( cyclooxygenase ) അഥവാ കോക്സ് എന്ന് പറയുന്ന എൻസൈമുകളാണ് ഇവയുടെ പ്രൊഡക്ഷനെ സഹായിക്കുന്നത്.
സൈക്ലൊ ഓക്സിജെനേസ് അഥവാ കോക്സ് എന്ന് പറയുന്ന എൻസൈമുകളാണ് ഇവയുടെ പ്രൊഡക്ഷനെ സഹായിക്കുന്നത്. രോഗാണുബാധ, അല്ലെങ്കിൽ മുറിവ് എന്നിവയുണ്ടായി ഒരിക്കൽ പി ജി ക്കാരുടെ പ്രൊഡക്ഷൻ തുടങ്ങിക്കഴിഞ്ഞാൽ ശരീരം കൂടുതലായി ഇവയെ ഉണ്ടാക്കാൻ ഉത്സാഹം കാണിക്കും. അത് കുറക്കാൻ ആകെയുള്ള മാർഗ്ഗം കോക്സിനെ ഭീഷണിപ്പെടുത്തി തടഞ്ഞു നിർത്താനുള്ള മരുന്നുകൾ കൊടുക്കുക എന്നത് മാത്രമാണ്. അതിനു നമുക്ക് പാരസെറ്റമോൾ , ആസ്പിരിൻ അല്ലെങ്കിൽ നീർവീക്കം കുറക്കുന്ന വിഭാഗം മരുന്നുകൾ ഉപയോഗിക്കാം.
പാരസെറ്റമോൾ ഉപയോഗിക്കുമ്പോൾ വേദനയും പനിയുമാണ് കുറയുക. നീർവീക്കം കുറയില്ല. തലച്ചോറിൽ ഉണ്ടാകുന്ന കോക്സിലാണ് ഇതിന്റെ പ്രധാന ജോലി നടക്കുക. ശരീരത്തിന്റെ മറ്റുഭാഗങ്ങളിൽ കറങ്ങി നടക്കുന്ന കോക്സിനെ തടസപ്പെടുത്തുന്നതിൽ പാരസെറ്റമോൾ വളരെ മോശമായ പ്രകടനമാണ് കാഴ്ചവെക്കുന്നത് , അതിനെ കുറ്റപ്പെടുത്തിയിട്ട് കാര്യമില്ല. അതിനെ രൂപപ്പെടുത്തിയിരിക്കുന്നത് അങ്ങനെയാണ് .
തെർമോസ്റ്റാറ്റ് : പാരസെറ്റമോൾ നിർദ്ദേശിക്കുമ്പോൾ ശരീരത്തിന്റെ കൂടിയ ചൂടിനെ കുറച്ചിട്ട് ശരിയായ താപനിലയിൽ കൊണ്ടെത്തിക്കുക എന്നതാണ് എന്റെ ജോലി. ചൂട് കൂടിയിട്ടില്ലെങ്കിൽ ഞാൻ നിസ്സഹായനാണ് . ആൾക്കാരിങ്ങനെ ഒരുപാട് പാരസെറ്റമോൾ കഴിക്കുമ്പോൾ എനിക്ക് പണ്ടൊക്കെ വല്ലാത്ത പേടിതോന്നും. എന്റെ സെറ്റിംഗ് എങ്ങാനും മാറിയിട്ട് ഒരു പാരസെറ്റാമോളിനു പത്തോ ഇരുപതോ ഡിഗ്രി വീതം കുറഞ്ഞു ഒടുവിൽ ശരീരത്തിന്റെ താപനില വളരെ കുറഞ്ഞുപോയി ഞാൻ അവരെ കൊന്നുകളയുമോന്ന്. ഈശ്വരൻ അങ്ങനെയൊരു കാര്യം ചെയ്തുവെക്കാതിരുന്നത് നന്നായി, നന്ദി പറഞ്ഞു ഞാൻ കിടന്നുറങ്ങും.
തുടരും ....
Comments
Post a Comment